Lutje

O Zot, Ti je më afër atyre që të duan, e më i gatshmi për të ndihmuar ata që të besuan. Ti mund ta shikosh thelbin e tyre më të fshehtë, Ti di gjithç ka të vetëdijes së tyre e Ti e di se sa u vlen intelekti. S’ka sekrete të tyre për Ty, se ato janë të hapura për Ty e sepse zemrat e tyre janë të etura për Ty. Kur ata i trishton vetmia, është kujtimi Yt që u jep ngushëllim. E kur i plakos mjerimi, është mbrojtja Jote që kërkojnë.

E dinë që çelësin e çdo gjëje e ke Ti në dorë e që s’mund të hedhin hap pa urdhrin Tënd. O Zoti im, nëse jam i paqartë dhe s’di të shpreh kërkesën time a s’mund të kuptoj se ç‘më duhet vërtet, tregomë se si të përmirësohem e çoma zemrën drejt qëllimit të drejtë. Kjo që të kërkoj nuk shkon kundër mënyrës Tënde të udhëzimit, as është gjë e re, që u shmanget udhëve të Tua të mbështetjes. O Zot, vepro me mua përmes ndjesës Tënde e mos vepro me mua si pas Drejtësisë Tënde.